Денес во Свети Николе, под покровителство на Меѓународниот Славјански Универзитет, се одржа петтиот Светски Велигденски натпревар во кршење со ноеви јајца. Иако на Велигденскиот штанд беа изложени повеќе видови декорирани јајца како кокшкини, гускини и јајца од препелица, натпреварувачите се кршеа само со ноеви јајца.
На натпреварот учествуваа дечињата од детската градинка „Рахилка Гонева“, а победник беше шестгодишната Сара Андреева, која изјави дека е пресреќна што со нејзиното, еден килограм тешко јајце, успеа да ги победи останатите учесници.
Манифестацијата беше проследена и од странски дипломати, меѓу кои и претставници од Амбасадата на Руската Федерација во Република Северна Македонија.
Нам, како организатори, ни претставуваше особена чест да бидеме домаќини на еден ваков весел настан. За следната година планираме да ја збогатиме програмата со дополнителни придружни содржини, кои ќе допринесат за популаризирање на настанот.
