На 29-ти март во 20:00 часот премиерно започна циклусот онлајн трибини „Криза во културата и/или култура во кризата”. Првиот дел беше посветен на театарот – значајна карика во културата како тоталитет, по повод Светскиот ден на театарот (27-ми март).
Имајќи предвид дека се наоѓаме во една криза предизвикана од КОВИД-19, сакавме да се насочиме кон истражување на културата како тоталитет. Фактот дека културата се наоѓа во своевидна криза или кризата води кон (не)културна индустрија повикани сме како Институт за култура и уметност при МСУ да се вклучиме во истражувањата, толкувањата, анализите за одредување на природата на културните феномени, нивното место и улогата во човековиот општествен и индивидуален живот, посебно во време на егзистенција (човечка, психолошка, економска, културна, здравствена, етичка, морална, универзална).
Нашата интенција е насочена преку транспарентност и афирмација на мислењата на оние кои се (ин)директно вклучени во градењето на културата да и го вратиме достојното место на културата, т.е. да ја одржиме и зачуваме како највиталниот дел во иднината на човековото егзистирање.
Aвтор на проектот e проф. д-р Соња Ризоска Јовановска, директор на Институтот за култура и уметност при Меѓународен Славјански Универзитет „Г. Р. Державин”.
Модератор на настанот беше Татјана Алексиќ, професор по македонски јазик во СУГС „Раде Јовчевски – Корчагин”.
Институтот за култура и уметност при Меѓународен Славјански Универзитет „Г. Р. Державин”, како домаќин на настанот, ја имаше таа чест своите реномирани гости и препознатливи имиња од тетарската уметност да ги потикне во име на љубовта кон театарот да проговорат за своите театарски искуства. Гости на настанот беа:
- Благоја Чоревски Чоре, филмски и телевизиски актер, актер во Драмски театар од 1971 година.
- Сулејман Рушити, доцент, надворешен соработник во Тетовскиот Универзитет. Режисер во гостиварскиот театар.
- Сашко Коцев, театарски, филмски и телевизиски актер, стендап комичар и водител, вработен во МНТ
- Софија Ристевска Петрушева, театарски режисер, вработена во НУЦК „Јордан Хаџи Константинов – Џинот” Велес, и сопственичка на приватниот Интимен Театар Битола.
- Катерина Шехтанска, дипломиран актер и поранешна балерина, вработена во Драмски театар.
- Марјан Георгиевски, актер, театарски режисер и стендап комичар.
Циклусот онлајн трибини подразбира сестрано вклучување на културните работници од сите дејности од земјата и од странство. Вториот дел од циклусот онлајн трибини ќе биде посветен на ликовната уметност и ќе се одржи во мај 2021.
